libmanan.com

PASTORAL LETTER

An Simbahan asin an Diocesis sa Ocasion kan pagpalangkaw kan Sede kan Libmanan

sa ranggo asin dignidad nin Sarong Diocesis

(Babasahon sa gabos na Misa kan Domingo antes kan kaaldawan kan Pagtugdas Canonico kan Diocesis kan Libmanan, Sunday June 14, 2009)

Sa gabos na kapadian, religioso asin sa Banwaan kan Dios.

Ngonian sinsabihan taka: “Ika gapo (Pedro), asin sa ibabaw kan gapo papatindogon ko an sakong Simbahan, asin an Kapangyarihan nin kagadanan dai makakadaog Saiya.”  (Mateo 16, 18)

Kamo mga kahimanwa kan mga banal, mga kaayon sa familia kan Dios. Kamo mga kabtang kan harong na pinatugdok sa mga Apostoles asin Profetas na an sarigang-gapo iyo si Jesu-Cristo…kamo man sa Saiya, pinatugdok na magin harong na pinageerokan kan Dios sa Espiritu. (Efeso 2,19-22)

ANO AN SIMBAHAN NA CATOLICO?

An Simbahan na Catolico iyo an komunidad nin mga tawo na saro ki Cristo asin inaantabayan kan Espiritu Santo, sa pamamayo kan mga kasalihid ni San Pedro asin kan Obispo na nakikisumaro sa Saiya. Kun siring, “sinda naglalakaw sa dalan pasiring sa Kahadean kan Dios Ama bilang tagapagdara kan mensahe nin kaligtasan na ipinapanongod para sa gabos.”

PANO NIATO MASASABOTAN AN SIMBAHAN?

An Simbahan bako sanang katiriponan nin mga tawo kundi “Banwaan kan Dios na inapod na magkasararo.” Binibilog ini kan gabos na inaalok na makihiras ki Cristo asin sa lambang saro, siring na sinda “saro sa Aki, sa pagkamoot sa Espiritu asin dayupot sa Ama.”

ANO AN INAAPOD NA LOKAL NA SIMBAHAN?

An Lokal na Simbahan, na kun saen an saro asin solong Katolikong Simbahan nabubuhay, iyo “principalmente” an mga Diocesis”. Alagad igwa nin nagkapirang forma nin Lokal na Simbahan na arog man sana (equivalent to) sa Diocesis arog kan “territorial Prelature”; “territorial Abbacy”; “Vicariate

Apostolic”; Prefecture Apostolic” asin permamenteng ini-estabilisar na “Apostolic Administration”. Sa lambang local na Simbahan asin katiriponan kan mga ini nahihiling an saro asin solong Katolikong Simbahan.

An Lokal na simbahan binibilog kan tolong importanteng elemento: a) An Banwaan kan Dios; b) An Obispo, pastor na namamayo digdi asin; c) An Katurugangan nin mga Kapadean o Presbyterio.

Ining manlaen-laen na forma nin Lokal na Simbahan (Canon 370-372) sosog sa ley kapantay asin kapareho man sana kan sarong Diocesis. Ini minarepresentar sana kan mga estado nin pagtalubo nin Lokal na Simbahan para magin Diocesis ngapit.

TANO TA IGWA PANG LOKAL NA SIMBAHAN?

Kun an teritorio binbanga asin nagsasadit, orog na nagigin magian an pag-administrar kaini. Sa kadakulaan asin hiwas kan nasasakopan kan Katolikong Simbahan, kaipuhan na magkaigwa nin mga Lokal na Simbahan tanganing mas mapagian an pag-administrar kan mga nasasakopan. Laen pa kaini, kun babalikan ta an kahulugan kan simbahan sa enot na hapot, sinasabi na an Simbahan pinamamayuhan kan kasalihid ni San Pedro na iyo an Santo Papa asin kan Obispo na nakikisumaro saiya. An Lokal na Simbahan palan iyo an mga Simbahan na pinamamayuhan kan mga Obispo. Alagad importanteng saboton na dapat an lambang Lokal na Simbahan danay na kasaro o nakikisumaro sa Santo Papa. An Simbahan Lokal arog man sa mga banwaan na pinamamayuhan kan mga “mayor” na dapat kasaro kan saindang gobernador.

ANO AN ESTADO KAN LIBMANAN KAIDTO?

An Libmanan kan isinuhay sa Arkidiocesis kan Caceres, minukna bilang sarong Prelatura. Ini ginibo asin nangyari pagkatapos na mahiling an manlaen-laen na circumstancias manonongod sa sitwasyon asin kamugtakan kan Lokal na Simbahan, na an estadong ini nin pagtalubo nahimo sa pagagi kan panahon.

ANO AN PRELATURA?

An Prelatura sarong forma nin Lokal na Simbahan, kun siring, sarong parte kan kabilogan kan Banwaan kan Dios, na igwang definidong teritoryo, an pangataman kaini sa espesyal na rason itinatao sa sarong Prelado, na namamayo digdi, arog man sana kan pamamayo kan Obispo Diocesano, bilang Pastor kaini (Canon 370).

An Libmanan kan enot na ini gibohon na Lokal na Simbahan inapod na sarong Prelatura na igwa nin definidong teritoryo (an bilog na Primer Distrito kan Camarines Sur kaiba an banwaan kan Milaor) na an pangataman itinao sa sarong Obispo Prelado (kaidto si Bishop Prospero Arellano) asin ngonian ining saindong lingkod.

ANO AN DIOCESIS?

An Diocesis (Canon 369) sinasabing “Principal na Forma” (principal form) nin Lokal na Simbahan nin huli ta ini an pinaka-comun asin pinaka natural na klase nin Lokal na Simbahan base sa estado asi kamugtakan kaini. Na bilang sarong Lokal na Simbahan natural asin normal na ini may pinagtaluboan na. Kaya baga, establisado na an saiyang estado manongod sa manlaen-laen na aspeto kan saiyang pagiging sarong Lokal na Simbahan.

Kaya, matapos an pag-adal asin paghiling kan buhay na pagtalubo kan Libmanan bilang sarong Lokal na Simbahan, kan Marso 25, 2009, pinag-aprobahan kan Santo Papa, Benedicto XVI, an petisyon kan saindong lingkod. Sa petisyon na ini, ipinahiling an magayon, mabalaog asin marhay na estado nin pagtalubo na igwa kita bilang sarong Lokal na Simbahan sa laog nin 19 taon. Kaya kan aldaw na ini, itinao kan Santo Papa an estado nin pagigin Diocesis kan Libmanan. An formal na celebrasyon kan Canonical na Pagtogdas gigibohon sa Junio 19, 2009 sa Libmanan, an centro kan satong Lokal na Simbahan.

KUNG SIRING ANO AN PAGKAKAIBA KAN PRELATURA SA DIOCESIS?

Ining duwa parehong forma nin Lokal na Simbahan, asin sosog sa ley, sinda pantay asin pareho. Alagad an Prelatura bilang sarong Lokal na Simbahan nasa estado nin pagtalubo bilang sarong Lokal na Simbahan- an pagtalubo na magin mas establisadong banwaan kan Dios; asin an Diocesis, totoo, kaipuhan pang padagos na magtalubo alagad sa estado niya hararom na an saiyang pinagtaluboan, kun baga yaon na an mga major na mga bagay-bagay na dapat igwa siya bilang sarong mauswag asin buhay na Simbahan.

Kaya kita bilang saro nang Diocesis nag-oogma sa balaog na ini nin pagtalubo na nahimo asin nagyare sa laog nin 19 taon. Kadakul na balaog na inako, kadakul na pagbabagong pwedeng ikahiras – Salamat sa Mahal na Dios s danay na pagkamarahayon Niya sa satong Komunidad Kristiana digdi sa Libmanan, salamat man ki Señor San Jose, an Patron kan Lokal na Simbahan sa danay na pag-ampon asin ki Santa Maria, Nuestra Señora del Pilar, na sa tabang ninda padagos kitang nabuhay bilang komunidad asin banwaan kan Dios. Mas paurugon logod niato an mas marhay asin mas dedikadong pangataman sa satuyang SARADIT NA KRISTIANONG KOMUNIDAD digdi sa Diocesis kan Libmanan.

+Jose R. Rojas

Obispo kan Libmanan